Jól á næsta leiti

Eftir bókhaldsvinnu undanfarna daga var það bara notalegt að kúra aðeins undir heitri sænginni og leyfa sér að vakna í rólegheitunum. Verkefni dagsins lá ekki alveg ljóst fyrir, ekkert sem bráðliggur á að gera, tvær frábærar stelpur sjá um búðirnar tvær svo ekki þarf að huga sérstaklega að þeim í dag. Tilhugsunin um að vera innandyra í dag varð enn notalegri þegar ég dró svo frá gluggum eftir að hafa búið um rúmið. Úti var lygn og falleg snjókoma og bíllinn þakinn snjó, mikið var gott að fara bara niður og fá sér morgunmat og kaffi, vona að Erling hafi náð Fréttablaðinu (það er algert happ hér á Selfossi að ná blaðinu því það koma svo fá blöð í þessa blessuðu kassa) og já þá var verkefni dagsins ákveðið.
Skreytum hús með grænum greinum.....nei annars bara öllu fallega jólaskrautinu okkar, það er verkefni dagsins..... Svo kíki ég örugglega útí búð seinna í dag því Erling er þar að breyta ísbúðinni og vinna við innréttingu hennar. Þetta verður góður dagur og já.....Fréttablaðið var á eldhúsborðinu......

Katrín Tara afmælisstelpa

Hún er ljóshærð með blá augu, mjög fjörug og skemmtileg, ákveðin og veit svo sannarlega hvað hún vill og hún er afmælisstelpa dagsins. Katrín Tara, ein af ömmustelpunum mínum og vinkona mín á afmæli í dag og er orðin sjö ára og það er sko ekki leiðinlegt. Hún er líka komin í annan bekk í skólanum og henni gengur mjög vel og fær frábæran vitnisburð enda dugleg í því sem hún er að gera. Hún er flinkur teiknari og er alltaf að teikna og lita flott listaverk handa okkur.

Katrín Tara á litla systir og sýnir henni óskipta athygli og er mjög góð við hana. Ég og hún eigum spes kveðju. Þegar hún var yngri þá vildi hún aldrei kyssa bless og þar sem ég er algerlega á móti því að þvinga börn til að kyssa fullorðna þá fundum við upp okkar eigin kveðju og höfum haldið því. Hún labbar í burtu, snýr sér við og ég sendi henni fingurkoss sem hún grípur og skellir á kinnina á sér og svo fæ ég einn tilbaka. Þvílíka krúttið.

Elsku Katrín Tara mín, við afi þinn óskum þér til hamingju með afmælisdaginn þinn, biðjum Guð að vaka yfir hverju þínu spori. Þú ert alger Guðs gjöf inn í líf okkar og við elskum þig meira en við getum sagt og hlökkum til að sjá þig á eftir.

Hann á afmæli í dag

Kalda vetrarnótt fyrir 52 árum fæddist hann á eftir hæðinni í húsi foreldra sinna. Hann var númer sjö í röðinni, fyrir voru 2 systur og 4 bræður og fjórum árum seinna fæddist svo yngsti bróðirinn. Þótt ekki sé lengra síðan þá tíðkaðist að konur fæddu börnin heima og sinntu jafnt út- sem innistörfum í hvaða veðri sem var, alla vega í sveitinni.

Hann var bara 16 ára þegar við kynntumst með mikið krullað sitt og strítt hár. Hann átti líka skellinöðru, svaka töffari og ég minnist þess þegar við Barbro vinkona fórum í helgarheimsóknir austur í Kot og fengur að vera aftan á til skiptis. Ég var orðin skotin í honum og ég held að hann hafi þá líka verið skotinn í mér. Pabbi og mamma samþykktu hann og daginn sem ég varð sautján trúlofuðum við okkur og okkur fannst við fullorðin. Lífið var alveg stórskemmtilegt og öll tækifæri notuð til að gera það enn skemmtilegra. Í dag, 33 árum seinna finnst okkur lífið enn skemmtilegra en þá. Við erum enn betri vinir og eyðum miklum tíma saman.

Afkomendahópurinn stækkar stöðugt, dæturnar eru fjórar, tengdasynirnir þrír, barnabörnin eru níu og eitt á leiðinni.

Já hann Erling minn fagnar í dag afmælinu sínu í 52. sinn. Síða krullaða hárið hefur að vísu löngu sagt skilið við hann og vangarnir eru orðnir eilítið silfraðir, barnabörnin okkar halda því reyndar fram að afi þeirra sé ekki með hár :) en þessi sjarmör nær ennþá að heilla ömmu þeira algerlega upp úr skónum. Ég er ákaflega stolt af honum, elska hann meira en hægt er að lýsa í fáum orðum og bið Guð að leyfa okkur að eldast saman svo við getum gengið saman inn í sólarlagið, tvær krumpaðar sveskjur hönd í hönd.

Þórey Erla afmælisskvísa

Þar sem ég er níu barna amma þá er ekki skrýtið að það séu oft afmælisskrif á síðunni minni. Það er mér samt alltaf mikil og sönn ánægja að segja ykkur frá afmælum þessara yndigulla sem skreyta lífið okkar Erlings meira en hægt er aðsegja í fáum orðum.

Í dag fagnar hún Þórey Erla sex ára afmælinu sínu og hún er sko búin að bíða eftir því. Hún er byrjuð í skóla og orðin fluglæs og skemmtir sér vel í skólanu, Svo er hún líka orðin nógu gömul til að geta farið í flugvél með systrum sínum að heimsækja ömmu og afa á Akureyri og það er sko spennandi skal ég segja ykkur. Þórey Erla er mjög geðgóð en veit samt alveg hvað húnvill og svo hefur hún ekkert fyrir því að vegja okkur afa sínum um fingur sér. Brosið hennar og stóru augun þegar hún kemur og smellir á mann kossi er algerlega ómótstæðilegt. Við erum góðar vinkonur og það er gaman þegar hún hringir og spyr hvort þau megi koma í heimsókn hingað á Selfoss. Hún er reyndar meiri afastelpa en ömmustelpa og ef hún hittir mig eina þá spyr hún alltaf um afa sinn áður en hún heilsar þetta litla yndigull. Hún er alger Guðs gjöf inn í líf okkar.

Elsku Þórey Erla okkar, við afi þinn óskum þér innilega til hamingju með daginn þinn, veit að þú verður dekruð í dag svo njóttu þess. Við elskum þig marga marga hringi, allan hringinn...

Erla Rakel afmælisstelpa...

Það eru þrjú ár síðan hún fæddist þessi litla ömmustelpa sem á afmæli í dag. Við sátum í límsófanum þann sunnudagsmorgun og biðum frétta því Eygló og Bjössi voru búin að vera alla nóttina á fæðingardeildinni og svo loksins komu fréttirnar að hún væri fædd. Já hún Erla Rakel á sko afmæli í dag. Um daginn sagði mamma hennar við hana að hún væri yndigull en hún var fljót að leiðrétta það og sagði mömmu sinni að hún væri stelpa, ekki yndigull. Erla Rakel er dugleg stelpa sem veit alveg hvað hún vill. Hún elskar litla bróður sinn og er afar góð við hann. Hún syngur heilmikið og spjallar við mann EF hún vill það sjálf, annars ekki :) Hún er líka mikil afastelpa og ef hún sér bara mig þá spyr hún eftir honum. Hún unir sér vel á leikskólanum sínum er dugleg þar.

Elsku Erla Rakel, við afi þinn óskum þér til hamingju með daginn þinn, þú ert alger Guðs gjöf inn í líf okkar og við elskum þig allan hringinn, marga hringi. Láttu nú dekra við þig í allan dag og við hlökkum til að koma í veisluna þína

Karlott afmælisbarn

Það er stutt á milli afmæla þeirra hjónakorna Karlotts tengdasonar okkar og Írisar en í dag fagnar hann afmælinu sínu í 36. sinn.

Karlott er einstaklega ljúfur og góður drengur og hvers manns hugljúfi. Glaðvær og á einstaklega auðvelt með að umgangast fólk og spjalla við það. Hann studdi Írisi með ráð og dáð meðan hún lagði stund á lögfræðinámið sitt og nú er komið að honum og fyrir nokkrum dögum hófst nýr kafli í lífi hans þegar hann settist á skólabekk í Háskóla Íslands og nemur félagsráðgjöf. Þar er hann sannarlega á réttri hillu og ég efast ekki um að honum á eftir að ganga vel í þessu námi og hafa gaman af því.

Íris og Karlott eiga 4 yndisleg börn saman og eru einstaklega samhent um allt er viðkemur heimilishaldi og barnauppeldi. Börn hænast að Karlott og ég hef ósjaldan séð fleiri en hans börn trítla við hlið hans í leit að spennandi ævintýrum úti í náttúrunni þegar við stórfjölskyldan erum samankomin, annað hvort í Kofanum eða í einhverju ferðalaginu.

Karlott er haldinn mikilli veiðibakteríu og ég hef grun um að hann hafi ekki áhuga á að læknast af þeirri bakteríu.

Elsku Karlott, við Erling sendum þér afmæliskveðju héðan frá Tíról og óskum þér innilega til hamingju með daginn þinn, við erum afar ánægð með þig og stolt af þér og við vitum að Íris og börnin munu dekra þig í dag. Sjáumst svo vonandi sem fyrst.

Íris afmælisstelpa

Það er alveg með ólíkindum hvað tíminn æðir áfram. Eins og hendi sé veifað þá eru liðin 33 ár síðan við Erling fengum frumburðinn í hendur. Yndisleg lítil stúlka sem lét samt bíða eftir sér í hálfan mánuð en sú bið var fljót að gleymast þegar hún var komin. Mamma mín sagði að ég væri heppin að hafa eyrun til að koma í veg fyrir að höfuðið klofnaði við brosið sem var fast á andliti mínu þegar hún kom að sjá fyrsta ömmubarnið sitt.

Íris hefur alltaf verið sjálfstæð og dugleg stelpa og lét ekki viðteknar venjur ákveða neitt fyrir sig og það voru löggu og bófaleikir frekar en barbí þegar hún var lítil stelpa. Reyndar var ég alveg viss um að ef hún myndi einhvern tímann eignast dóttur eða dætur þá yrðu þær aldrei klæddar í bleik föt en sú varð þó ekki raunin því dætur hennar þrjár eru oftast í bleiku og sonurinn í ekta strákafötum. Íris og Karlott maðurinn hennar eru einkar samhent hjón og eru dugleg að eyða tíma með börnunum sínum fjórum og skapa skemmtilegar minningar fyrir þau í minningarbankann. Hún er alger snillingur í kökugerð og hefur gert margar flottar kökur við hin ýmsu tækifæri og má þar nefna brúðartertu sem hún gerði um daginn fyrir brúðkaup Örnu systur sinnar og Hafþórs. Hún er núna í fæðingarorlofi en hún starfar sem lögfræðingur hjá Ríkisskattstjóra og unir sér vel þar.

Elsku Íris mín, við pabbi þinn óskum þér innilega til hamingju með daginn þinn, veit að þú verður dekruð og mundu að við elskum þig marga marga hringi, allan hringinn, þú ert okkur afar dýrmæt Guðs gjöf og einn af augasteinunum okkar.

Petra Rut afmælisgull

Ég er alveg einstaklega rík kona, á marga afkomendur og tengdabörn og í dag er einmitt afmæli í stórfjölskyldunni minni. Ung stúlka, næst elst barnabarnanna minna er 9 ára gömul í dag. Já það er einmitt hún Petra Rut mín sem fagnar einu ári í viðbót. Hún, líkt og mamma hennar fæddist nánast fullorðin og hún er mjög dugleg og samviskusöm stelpa. Ákveðin og veit hvað hún vill, elskar litlu systkini sín þótt auðvitað fari þau stundum í taugarnar á henni nema kannski helst sú yngsta, Marta Líf. Hún elskar að fá að halda á henni og hugga hana. Petra Rut var fljótt læs og skrifandi og fær frábærar umsagnir í skólanum sínum. Hún er afar listræn og teiknar þvílíkt flott og hannar föt á dúkkurnar sínar og teiknar þau á blað.

Hún er mikil vinkona mín og það er svo gaman þegar við hittumst hvað hún fagnar manni vel og hún er alltaf til í að kíkja í heimsókn til okkar afa síns og ömmu. Uppáhalds liturinn hennar er fjólublár. Hún er líka mjög flink í fimleikum og hefur afar gaman af þeim.

Elsku Petra Rut mín, við afi þinn óskum þér innilega til hamingju með daginn þinn, við vitum að þú verður dekruð sem aldrei fyrr og við hlökkum til að koma í afmælisveisluna þína.

Þú ert alger Guðs gjöf inn í líf okkar og við elskum þig marga marga hringi.

Danía Rut afmælisskvísa

Í dag eru liðin níu ár frá því að ég fékk ömmutitilinn í fyrsta sinn. Við vorum að koma úr ferðalagi og komin til Akureyrar og vorum frekar spennt því samkvæmt dagatalinu átti barnið að vera fætt. Það var svo aðfaranótt 24. júlí sem skvísan kom í heiminn og við Erling þar með orðin afi og amma. Daníar Rut, sem í dag fagnar 9 ára afmælinu sínu, hefur alla tíð verið mikill gleðigjafi í lífi okkar og þrátt fyrir veikindi í byrjun þá er hún við hestaheilsu í dag, afar hress og skemmtileg stelpa. Danía Rut greindist einhverf þegar hún var 5 ára en þar sem hún er ekki með neina þroskaröskun Þá gengur hún í venjulega skóla og fær þar smá aðstoð. Hún er með það alveg á hreinu hvers vegna hún er einhverf eins og sést á þessu sem ég tók af síðunni hjá mömmu hennar: "Við sátum við morgunverðarborðið þegar Danía Rut segir allt í einu bara alveg upp úr þurru..stelpur vitiði hvað, þegar Jesú var að búa mig til þá setti hann vitlausan heila í mig og þess vegna er ég einhver. Stelpurnar voru ekki alveg að samþykkja þetta svo daman hélt áfram og sagði, sko Guð hann fór niður og sótti öðruvísi heila og setti í mig og þess vegna er ég einhverf. Þótt hlutirnir geti verið erfiðir að skilja þegar maður er einhverfur þá skilur daman þetta allavega mjög vel og er komin með sína eigin skýringu á einhverfunni sinni "

Danía Rut er dugleg stelpa, elskar lítil börn og dýr og þá sérstaklega kisur og hún á kisuna Prins Mjá sem amma hennar í sveitinni geymir fyrir hana því mamma hennar er með ofnæmi fyrir kisum. Hún elskar að dansa og hefur sýnt hæfileika á því sviði.

Elsku Danía Rut okkar, við afi þinn óskum þér innilega til hamingju með afmælið þitt og við vitum að þú verður dekruð í dag sem aðra dag. Við elskum þig meira en hægt er að segja með orðum og hlökkum til að fara í ferðalag með ykkur á morgun.

Bjössi afmælisbarn

Eins og lesendur mínir vita þá er ég svo heppin að tilheyra stórri fjölskyldu og í minni nánustu fjölskyldu þá er ég ættmóðir margra og því eru oft afmælisskrif á síðunni minni og svo er einmitt í dag. Einn af þremur tengdasonum okkar, hann Bjössi hennar Eyglóar á afmæli í dag, er orðinn 37 ára kappinn. Hann er vélfræðingur að mennt og starfar við sitt fag hjá Marel og er vel liðinn þar sem og af öðrum sem þekkja hann enda greiðvikinn mjög og gott að leita til hans. Bjössi hefur gaman af að veiða og notar óspart tækifærin til að renna fyrir fisk. Allir tengdasynir mínir eru góðir vinir og ég er mjög þakklát fyrir það. Eygló og Bjössi eru mjög samhent og njóta lífsins í botn ásamt Erlu Rakel og Andra Ísak og eru dugleg að leggja inn í minningarbanka barnanna og það er mjög dýrmætt.

Elsku Bjössi minn, við Erling sendum þér innilegar hamingjuóskir í tilefni dagsins og við hlökkum til að kíkja á þig fljótlega og við biðjum þér og fjölskyldunni allri ríkulegrar Guðs blessunar.

Stóri prinsinn orðinn 4ra ára

Ég er þeirrar skoðunar að allir dagar sem við fáum úthlutað séu merkisdagar en þó eru auðvitað sumir dagar miklu merkilegri en aðrir. Í dag er einn af þeim dögum. Við Erling erum svo lánsöm að vera umkringd barnabörnum og í dag er eldri prinsinn í hópnum orðinn fjögurra ára gamall. Erling Elí fæddist á fallegum sunnudegi fyrir fjórum árum og varð strax einn af augasteinunum okkar afa síns og ömmu. Þessi litli stóri yndis drengur er flottur og duglegur strákur, alger prakkari og grallaraspói sem bræðir alla sem eru kringum hann en hann er sérstaklega hændur að Erling afa sínum og í hvert sinn sem ég kem ein í heimsókn til þeirra er ég varla komin inn þegar hann spyr um afa sinn og bara gaman af því. Erling Elí er sannur strákur og alger bíladellukall, elskar allt með mótora, geimflaugar og allt svona ekta stráka dót. Um daginn var hann hjá okkur og vildi endalaust hafa afa sinn með sér í að skoða jeppa í tölvunni og svo vildi hann sjá flott bíla DVD sem hann á.

Elsku Erling Elí minn, við afi þinn sendum þér bestu hamingjuóskir með daginn þinn og við hlökkum til að koma í veisluna þína. Þú ert alger Guðs blessun í líf okkar og við erum Guði þakklát fyrir þig. Láttu alla dekra við þig sem aldrei fyrr. Við elskum þig milljón hringi og aðeins fleiri líka litli stóri strákurinn okkar.

Hann á afmælisdag.....hann lengi lifi

Eins og ég hef margsagt ykkur lesendur mínir þá er ég orðin ættmóðir margra og því eru oft afmælisdagar hjá mínu fólki og í dag er einmitt einn slíkur. Einn af þremur tengdasonum okkar, hann Hafþór hennar Örnu á afmæli er 35 ára í dag.

Þegar Arna kynnti hann fyrir okkur fyrir tveimur árum síðan leist okkur strax vel á hann og hann hefur staðið undir væntingum okkar. Hann hefur tekið stelpunum hennar Örnu sem sínum eigin og var fljótur að vinna sér inn hylli þeirra og þær kalla hann Hafþór pabba. Þær eru líka búnar að segja mér að þær fái að vera brúðarmeyjar við brúðkaup þeirra sem verður í ágúst. það var ekki laust við að þær væru spenntar yfir því dömurnar litlu, stóru.

Hafþór er Eyjapeyi, fæddur þar og uppalinn, vélfræðingur að mennt og starfa við það í vélsmiðju í Hafnarfirði. ásamt því að eiga og reka hljóð og tækjaleigu í Vestmannaeyjum í samvinnu við félaga sinn. Þau Arna eru afar samhent og eru dugleg að leggja inní minningarbanka stelpnanna og gaman að fylgjast með þeim.

Elsku Hafþór, við Erling óskum þér innilega til hamingju með daginn þinn, við erum ánægð með þig og það var gaman að gleðjast með þér í gær og ég efast ekki um að stelpurnar þínar fjórar dekri við þig í dag sem aldrei fyrr. Kveðja frá okkur í Húsinu við ána.

Elsku pabbinn minn

Ég er svo heppin að tilheyra stórri fjölskyldu og fyrir það er ég Guði þakklát. Því fylgir auðvitað að afmælisdagar eru margir og mér finnst alltaf mikil ástæða til að fagna hverjum og einum þeirra því lífið sjálft er gjöf sem okkur er gefin. Í dag er það ættfaðirinn hann pabbi minn sem fagnar afmælisdegi sínum og núna í 72. sinn. Hann pabbi er alveg frábær og sérlega umhyggjusamur um okkur öll, vill alltaf vita þegar við erum á ferðinni og ósjaldan hefur hann hringt og athugað með mig og mitt fólk hvort við séum örugglega komin heim í hús þegar veður eru válynd á heiðum eða þegar slys hafa gerst á þeirri leið sem við ökum til og frá vinnu.

Þegar við Erling opnuðum ísbúðina í fyrra og fatabúðina núna um daginn þá fylgdist hann með öllu því ferli af miklum áhuga og hann spyr alltaf reglulega hvernig gangi og mér þykir afar vænt um það.

Pabbi var lengst af bílstjóri á Hreyfli, var formaður félagsins í langan tíma og hann vann af miklum heilindum fyrir félagið og var t.d. sá sem lagði mikla áherslu á að tölvuvæða bílana og kom þeirri hugmynd í framkvæmd. Hann spilar alltaf bridge með þeim félögum sínum og það eru ófá verðlaunin sem hann hefur komið með heim eftir spilakvöld. Um daginn fór hann svo með þeim til Kanaríeyja til að spila. Ég hinsvegar veit varla muninn á spaða og ás. Afkomendur hans og tengdabörn eru eitthvað í kringum 50 og því er oft þröngt á þingi þegar við komum öll saman í litla ömmuhúsinu hans og mömmu. Litlu langafabörnin kalla hann Langa að hans eigin ósk, honum finnst alltof langt fyrir þau að segja langafi og að mér læðist sá grunur að hann sé bara nokkuð stoltur af okkur öllum.

Elsku pabbi minn, innilega til hamingju með daginn þinn, hlakka til að sjá þig á eftir.

Elska þig endalaust, Erlan þín

Mamma mín afmælisskvísa

Elsku besta og yndislega mamman mín á afmæli í dag, 71 árs skvísan þótt það trúi því enginn enda er hún svo ungleg þessi elska. "Hvaðan kemur hún mamma þín eiginlega" var ég spurð að um daginn. "Hún kemur frá himnum enda alger engill" svaraði ég. "Já það hlýtur að vera því það fylgir henni svo sérstakur andi og mikill friður og ró" sagði þá spyrjandinn við mig. "Henni er svo annt um alla og er ekki bara að hugsa um sitt fólk heldur virðist hún hafa tíma fyrir alla".

Já hún mamma mín er svo sannarleg einstök kona og þótt hún sé nú langt frá því að vera fyrirferðamikil þá hefur hún breitt bak og það eru ófáir sem koma til hennar með ólíklegustu vandamál sín og hún hefur tíma fyrir alla.

Við erum miklar vinkonur og hún er alltaf til staðar fyrir mig og mitt fólk ásamt okkur öllum í stórfjölskyldunni. Rúmlega fertug lét hún draum sinn rætast og hóf nám og það voru stoltir krakkar sem mættu við útskriftina hennar þegar hún útskrifaðist sem hjúkrunarfræðingur 46 ára gömul og hún er þeim hvatning sem langar að læra en halda að þeir séu of gamlir til þess.

Elsku mamma mín, um leið og ég óska þér til hamingju með daginn þinn vil ég segja þér að ég er Guði svo þakklát fyrir þig hafa valið þig til að vera mamma mín, ég er svo stolt af þér og elska þig milljón. Vona að afmælisdagurinn verði þér góður og frábær og ég hlakka til að hitta þig á eftir.

Þrítugar afmælisstelpur

Við eldhúsborðið í gærkvöldi vorum við Erling að rifja aðeins upp tímann fyrir 30 árum og 4 mánuðum síðan og það sem allt hefur breyst. Við áttum von á okkar öðru barni og í mæðraskoðun, þá komin 5 mánuði á leið, vildi ljósan endilega senda mig suður í sónar. Við bjuggum á Akranesi og þá tíðkaðist ekki að allar konur færu í sónar, bara ef eitthvað var öðruvísi en átti að vera. Ljósan sagði við mig að hana grunaði að ég væri gengin lengra með barnið en blæðingar sögðu til um. Eftir á að hyggja er ég viss um að hana grunaði ástæðu þess að legið var miklu hærra uppi en hún orðaði það samt ekki við mig. Ég fór því suður með Akraborginni og tók Írisi með en það tíðkaðist ekki heldur að feður færu með í sónar. Við áttum engan bíl svo við mæðgur gengum niður að höfn og svo tók mamma, þessi elska, á móti okkur í borginni og keyrði mig á spítalann í sónar og beið frammi á meðan með litlu dömuna okkar. Hún sagði mér svo seinna að ég hefði verið hvítari en hvítt lak þegar ég kom fram frá lækninum og sagði ekki margt annað en að hún hafði haft rétt fyrir sér, börnin væru tvö. Þar sem við áttum heldur ekki síma höfðum við ákveðið að Erling færi á símstöðina í hádegishléinu og myndi hringja í mig til að vita hvað hefði komið út úr sónarnum. Þótt mamma mín væri búin að segja við mig að henni kæmi ekki á óvart að börnin væru tvö þá trúði ég henni aldrei og fannst það mjög fjarstæðukennt. Hvað um það, Erling var einmitt að rifja það líka upp í gær þegar hann stóð í símaklefanum utan við símstöðina og fékk fréttirnar. Hann sagði ekkert, og þá meina ég ekkert, í svona eina mínútu. Þetta var nett sjokk fyrir okkur enda vorum við bara tvítug og Erling í námi en svo leið meðgangan og við vorum orðin mjög spennt þegar þær létu svo sjá sig stelpurnar okkar.

Mér finnst ótrúlega stutt síðan þetta var en engu að síður er það staðreynd að í dag fagna Eygló og Arna, tvíburadætur okkar 30 ára afmælinu sínu. Þær munu samt ekki vera hrifnar af mér að tala um þær sem tvíbura. Þær elska að vera tvíburar en það má ekki tala um þær sem slíkar enda eru þær tveir sjálfstæðir einstaklingar þótt við stríðum þeim stundum með þeirri staðreynd að þær eru líffræðilega nákvæmlega eins. Auðvitað eru þær samt ekki eins en þær eru ótrúlega samrýmdar og það er einhver óskiljanlegur þráður milli þeirra. Þeim dreymir jafnvel sömu drauma sömu nótt og stundum kaupa þær alveg eins gjafir handa hvor annarri án samráðs. Ég held reyndar að einungis eineggja tvíburar geti skilið þessi tengsl sem eru þarna á milli.

Þær hafa alla tíð verði yndi okkar og stolt ásamt hinum systrum sínum. Þær elska að eiga afmæli og löngu áður en dagurinn rennur upp er búið að skipuleggja hann og ég vona að þær haldi þessu áfram, leyfi afmælisbarninu í sér alltaf að njóta sín í botn. Þær vinna báðar á leikskóla, þó ekki þeim sama og þeim líkar vel að vinna með börnum enda eru þær báðar mömmur sjálfar.

Eygló og Bjössi eiga Erlu Rakel sem er tveggja ára síðan í október og svo fæddist Andri Ísak 20. feb sl og hann er því bara rétt viku gamall.

Arna á þrjár dætur, Daníu Rut 8 ára, Söru Ísold 7 ára og Þórey Erlu 5 ára og elur þær upp með Hafþóri sínum sem tekur þær algerlega sem sínum eigin.

Elsku stelpurnar okkar, við pabbi ykkur óskum ykkur innilega til hamingju með daginn ykkar. Vonum að hann verði ykkur frábær í alla staði. Við elskum ykkur meira en orð fá lýst og erum afar stolt af ykkur.

Sara Ísold 7 ára afmælisprinsessa

Í dag eru sjö ár síðan þriðja barnabarn okkar Erlings leit dagsins ljós norður á Akureyri. Við höfðum fylgst með gangi fæðingarinnar alla nóttina gegnum símtöl frá örnu og svo var það snemma á sunnudagsmorgni sem við fengum símtalið um að dóttir væri fædd og allt í lagi með þær mægður. Já hún Sara Ísold vinkona okkar er sjö ára í dag og er búin að bíða lengi eftir þessum degi. Hún er mjög dugleg stelpa og ákveðin, löngu orðin læs og dugleg að skrifa. Hún er kát og skemmtileg en ef henni mislíkar eitthvað þá hikar hún ekki við að láta okkur vita af því. Brosið hennar heillar mann algerlega og blikið í augunum er ómótstæðilegt.

Það átti að halda uppá afmælið hennar á sunnudagin var en veikindi komu í veg fyrir það en veislan verður haldin aðeins seinna. Hennar helsta áhugamál eru hestar og svo er barbie að komast nokkuð nálægt því að vera líka í uppáhaldi. Aðspurð langaði hana í úr, playmo, hlaupahjól og snú snú band. "Amma, það er svona rosalega langt sippuband" sagði hún til útskýringar enda ekki reiknað með að ömmur viti hvað snú snú band er :)

Elsku Sara Ísold okkar, við afi þinn óskum þér innilega til hamingju með afmælisdaginn þinn, þú ert alger Guðs gjöf inní líf okkar og við elskum þig meira en orð fá lýst. Við vitum að þú verður dekruð í dag og njóttu þess í botn.

Hrund afmælisprinsessa

Það er alveg með ólíkindum að í dag séu liðin 22 ár frá því að yngsta barnið mitt fæddist en engu að síður er það staðreynd. Það var sunnudagurinn 8. janúar og klukkan alveg að verða fjögur að degi til þegar hún fæddist. Hún opnaði annað augað, sá föður sinn, leist vel á hann og lokaði augunum aftur, hefur sennilega séð að hún var komin í öruggar hendur. Hrund er ein af þeim sem eru fæddir leiðtogar og því hefur það reynst henni auðvelt að fá félaga sína til að láta af leiðinlegri breytni sinni gagnvart þeim sem eru minni mátttar. Hún er líka samkvæm sjálfri sér og lætur verkin sín frekar tala en orð en samt er henni aldrei orðavant, það má segja að frá því hún var altalandi, aðeins eins og hálfs árs gömul, þá hefur hún varla stoppað.

Í haust hóf hún nám á sálfræðibraut Háskólans í Reykjavík og líkar vel þar enda búin að kynnast fullt af skemmtilegum krökkum sem hún eyðir tíma með bæði við nám og skemmtun. Núna á þriðjudaginn verða þau tímamót hjá henni að hún tekur á leigu íbúð hjá Námsmannaíbúðum og það er að vonum stórt skref.

Elsku Hrundin mín, við pabbi þinn óskum þér innilega til hamingju með afmælisdaginn þinn og við vonum að hann verði þér góður. Við elskum þig meira en hægt er að segja með orðum og erum afar stolt af þér. Guð blessi þig og veiti þér það sem hjarta þitt þráir.

Katrín Tara afmælisstelpa

Hún er ljóshærð með blá augu, mjög fjörug og skemmtileg, ákveðin og veit svo sannarlega hvað hún vill en brosið hennar....blikið í augunum...hún er bara yndisleg.

Hún Katrín Tara, ein af ömmustelpunum mínum og vinkona mín, algerlega ómótstæðileg lítil (stór) dama er loksins orðin sex ára en hún hefur beðið eftir því síðan á síðasta afmælisdeginum sínum. Hún vissi auðvitað að þegar maður er sex ára þá byrjar skólinn og það er sko gaman. Henni gengur vel í skólanum, fær góðan vitnisburð og er dugleg í því sem hún á að gera. Katrín Tara æfir fimleika og vill alltaf sýna okkur afa sínum hvað hún getur og það er sko ekki lítið. Hún er mjög góð í að teikna og lita og er alltaf að gleðja okkur með fallegum teikningum.

Ég og hún eigum okkur spes kveðju. Þegar hún var yngri þá vildi hún aldrei kyssa bless og þar sem ég er algerlega á móti því að þvinga börn til að kyssa fullorðan þá fundum við upp okkar eigin kveðju og höfum haldið því við. Þegar þau fjölskyldan eru að fara frá okkur eða við frá þeim þá labbar hún í burtu, snýr sér svo við og ég sendi henni fingurkoss sem hún svo grípur og skellir á kinnina á sér og svo fæ ég einn tilbaka. Þvílíka krúttið.

Elsku Katrín Tara mín, við afi óskum þér til hamingju með afmælisdaginn þinn, við biðjum Guð að vaka yfir hverju þínu spori. Þú ert alger Guðs gjöf inní líf okkar eins og systkini þín og frænkurnar þínar. Við elskum þig meira en orð fá lýst og hlökkum til að koma í veisluna þína.

Tilvera okkar er undarlegt ferðalag.....

"Erla mín, þetta er Binna", sagði röddin í símanum við mig í gærmorgun. "Hæ" svaraði ég, "hvað segirðu" vitandi að ég myndi hitta hana og fleiri skólasystur mínar um kvöldið í fimmtugsafmæli einnar af okkur. "Kibba var að hringja í mig og ungi maðurinn sem dó í Noregi er náfrændi hennar og ég tók að mér að láta ykkur vita að það verður auðvitað ekkert afmæli í kvöld".
Við spjölluðum smástund og eftir að hafa kvatt hana og lagt á þá var ég þungt hugsi. Hugur minn var allur hjá Kibbu og fólkinu hennar og ég veit að þau eru samheldin og Kibba nýbúin að vera í Noregi í heimsókn hjá þeim. Það er svo stutt á milli gleði og sorgar og við erum ekki viðbúin því að eitthvað hendi okkur eða okkar fólk. Og hugsanir mínar héldu áfram. Hvernig kem ég fram við fólk, hvernig met ég það sem ég á, nýti ég tímann til að njóta þess að eiga vini og fjölskyldu og þannig get ég haldið áfram.

Í dag erum við Íslendingar að ganga í gegnum erfiða tíma, erfiðleika sem okkur datt ekki í hug fyrir örfáum árum að myndi yfir okkur ganga. Erfiðleika sem fæst okkar hafa til unnið heldur erum við að gjalda fyrir gerðir örfárra manna sem með græðgi og yfirgangi hafa sett íslenskt efnahagskerfi á hliðina. Ég ætla ekki að gera lítið úr þessum erfiðleikum því þeir eru vissulega miklir. Ég veit þó að núna sem aldrei fyrr er það nauðsynlegt fyrir okkur að horfa á allt það jákvæða sem við eigum í mannauð okkar Íslendinga því við erum hörkudugleg þjóð og eigum eftir að sigla uppúr þessum erfiðleikum og standa betur að vígi en áður. En við verðum að standa saman, efla fjölskyldugildin, efla vináttuna og samstöðuna og vera jákvæð.
Á þessum tímum er það okkur líka nauðsyn að fara í naflaskoðun og skoða hvað er dýrmætast og þess virði að halda áfram.

Í gær tók ég ákvörðun.
Ég vil keppa að því að njóta hversdagsins, njóta litlu óvæntu stundanna, njóta stóru skipulögðu stundanna og bara að njóta þeirra forréttinda sem mér voru gefin í fjórum frábærum dætrum, þremur yndislegum tengdasonum og ömmugullunum mínum sjö og þessi tvö sem enn eru bumbubúar. Að ég tali ekki um manninn minn sem er besti vinur minn og sálufélagi. Svo á ég yndislega foreldra sem vilja allt fyrir mig og mitt fólk gera, ég elska þau.

Ég ætla að vera duglegri að segja fólkinu mínu hvað ég elska þau, segja stelpunum mínum hvað ég er stolt af þeim og því sem þær eru að fást við hverju sinni. Ég ætla að vera meira til staðar, leiðbeina og hvetja áfram því ég er svo þakklát fyrir að eiga fjölskyldu. Ég er þakklát fyrir óhreint leirtau í vaskinum og óhrein föt í þvottakörfunni því það merkir að það er líf á heimilinu.
Ég nýt þess að eiga litla Kofann okkar í sveitinni og þar er allt sem þarf þótt fermetrarnir séu ekki margir enda fátt notalegra eða rómatískara en logarnir sem loga í kamínunni.

Ég ætla að nota flottu bollana mína hvenær sem ég vil, ég á ekki neitt spari ilmvatn því ég vil bara nota það besta alltaf. Ég ætla vera duglegri að heimsækja fólkið mitt og vini, droppa inn smástund án þess að gera boð á undan mér svo varið ykkur bara þið sem lesið. Heimsóknir hafa alltof mikið dottið niður því við erum jú "öll svo upptekin". Í stuttu máli sagt, ekki geyma eitthvað þangað til betra tækifæri gefst því ég get ekki verið viss um að það komi.
Ég hef einsett mér að njóta hverrar einustu mínútu í lífinu því lífið sjálft er stórkostleg gjöf sem okkur er gefin TIL AÐ NJÓTA.

Hann á afmæli hann Erling

Ég sá hann fyrst fyrir 34 árum, renglulegan strák með sítt og krullað hár. Ég spurðist fyrir um það hver hann væri og var sagt að þetta væri hann Erling úr Kotinu. Það var eitthvað sérstakt við hann og mig langaði að kynnast honum betur. Síðan þá höfum við gengið saman gegnum lífið, hann er besti vinur minn og sálufélagi og sá einasti eini sem þekkir mig betur en ég sjálf og er mjög næmur á allt sem mér viðkemur. Það þýðir heldur ekkert að segja honum annað en satt þegar hann spyr um líðan mína og hann er óþreytandi að gleðja mig á allan mögulega hátt.

Afkomendahópurinn stækkar stöðugt, dæturnar eru fjórar, tengdasynirnir þrír, barnabörnin eru sjö og tvö á leiðinni. Það er því óhætt að segja að hann sé umvafinn aðdáendum því dætur okkar og barnabörn elska hann enda hefur hann reynst þeim sá sterki og stöðugi klettur sem börn þurfa að eiga að. Krakkarnir okkar eru og verða alltaf börnin okkar þótt þau séu orðin fullorðin og ekki leiðist honum að dekra barnabörnin sem spyrja alltaf fyrst um hann þegar þau mæta á svæðið:o)

Erling á tvö stór áhugamál sem hann sinnir mjög vel. Annars vegar er það veiðidellan enda skylda hvers manns að draga björg í bú, ekki satt......og svo er það mótorhjóladellan og ekki hægt að segja að frúnni leiðist mikið að vera hnakkaskraut aftan á hjá honum.

Í dag fagnar flotti maðurinn minn afmælinu sínu í 51. sinn. Síða krullaða hárið hefur að vísu löngu sagt skilið við hann og vangarnir eru orðnir eilítið silfraðir, barnabörnin okkar halda því reyndar fram að afi þeirra sé ekki með hár :o) en þessi sjarmör nær ennþá að heilla ömmu þeirra algerlega upp úr skónum. Ég er ákaflega stolt af honum, elska hann meira en hægt er að lýsa í fáum orðum og bið Guð að leyfa okkur að eldast saman svo við getum gengið saman inní sólarlagið, tvær krumpaðar sveskjur hönd í hönd.....