mánudagur, apríl 09, 2012

Pabbi minn afmælisbarn dagsins



Ég er svo heppin að tilheyra stórri fjölskyldu og fyrir það er ég Guði þakklát. Því fylgja auðvitað margir afmælisdagar og sjálfsagt að fagna hverjum og einum þeirra því lífið sjálft er gjöf sem okkur er gefin. Í dag er það ættfaðirinn hann pabbi minn sem á afmæli, 73 ára gamall. Hann pabbi er bara frábær og er sérlega umhyggjusamur um okkur öll og finnst betra að vita hvar við erum sérstaklega ef veður eru válynd á heiðum. Þá hringir hann gjarnan til að vita að við séum komin örugg í hús og mér þykir mjög vænt um þessa umhyggju hans.

Hann fylgist líka vel með hvað við erum að bralla og spyr hvernig gangi t.d. með búðirnar okkar Erlings. Pabbi var lengst af bílstjóri á Hreyfli, var formaður félagsins í langan tíma og vann af miklum heilindum fyrir félagið. Hann spilar enn bridge með félögum sínum af stöðinni og það eru ófá verðlaunin sem hann hefur komið með heim eftir spilakvöld.

Afkomendur hans eru orðin vel á sjötta tuginn og því er þröng á þingi þegar við komum öll saman í litla ömmuhúsinu hans og mömmu en endalaust gaman samt. Litlu langafabörnin hans kalla hann Langa að hans eigin ósk og um daginn þá sagði ein ömmustelpan mín að hún elskaði Langa, langömmu og lang Írisi :)

Elsku pabbinn minn, innilega til hamingju með daginn þinn, efast ekki um að það verði dekrað smá við þig í dag og við sjáumst sem fyrst.



Elska þig endalaust



Erlan þín

laugardagur, mars 31, 2012

Marta Líf eins árs afmælisprinsessa



Það er alveg hreint ótrúlegt að það skuli vera komið heilt ár síðan litla (ekki samt minnsta :) ömmustelpan mín ákvað að skjótast í þennan heim á "Saga class" eins og mamma hennar orðaði svo skemmtilega. Ég var búin að fara í bæinn og sækja systkini hennar því það var ljóst að daman var um það bil að fara að láta sjá sig. Það var svo snemma kvölds sem Íris hringdi og spjallaði fyrst við eldri börnin sín og sagði okkur svo frá að daman hefði verið tekin með bráðakeisara en allt gengi vel og að þeim mæðgum heilsaðist vel. Hún fékk strax nafnið Marta Líf og er alger gleðigjafi inní líf okkar allra. Hún er alltaf svo brosandi og kát og yndisleg að það er enginn vandi að heillast algerlega af henni.

Stóru systkini hennar eru dugleg að leika við hana og eldri systurnar passa hana af kostgæfni.

Hún er dugleg stelpa og fer vel fram og hún er svo heppin að mamma hennar gat lengt fæðingarorlofið og unnið heima við svo sú stutta nýtur lífsins í dekri og þægindum.

Elsku litla yndigull, við afi þinn óskum þér til hamingju með daginn og hlökkum til að koma í afmælisveisluna þína. Við elskum þig endalaust litli gleðigjafi og hjartabræðari.

mánudagur, mars 12, 2012

Mamma afmælisskvísa



Elsku bestasta og yndislegasta mamman mín á afmæli í dag og þótt það trúi því fáir sem sjá hana þá er hún orðin 72ja ára gömul þessi unglega stelpa. Það var ekkert til sparað þegar Guð skapaði hana, henni var úthlutað óteljandi hæfileikum og fegurð og ég segi það enn og hef alltaf sagt að það er ekkert sem hún getur ekki gert þessi elska. Hún er svo sannarlega einstök kona og allir sem kynnast henni elska hana enda ekki annað hægt. Hún er ekki fyrirferðamikil kona en hún hefur breitt bak og hefur tíma fyrir alla sem leita til hennar og þeir eru sko ófáir. Ég er líka svo heppin að eiga hana ekki bara fyrir mömmu heldur erum við líka vinkonur og hún er alltaf til staðar fyrir mig og allt mitt fólk. Þar sem hún er hjúkka þá er auðvitað alltaf byrjað á að leita ráða hjá henni fyrst ef eitthvað kemur uppá enda hefur reynslan kennt henni svo margt og hún er oft á við besta lækni, getur allavega vel metið hvert á svo að halda næst ef það þarf að leita lengra.



Elsku mamman mín um leið og ég óska þér til hamingju með daginn þinn vil ég segja þér að ég er Guði svo þakklát fyrir að hafa valið þig til að vera mamman mín og ég er svo stolt af þér og elska þig milljón. Njóttu dagsins þíns í botn. Knús frá okkur Erling úr sveitinni

fimmtudagur, mars 01, 2012

Eygló og Arna afmælisstelpur



Ég man það eins og það hafi gerst í gær þegar ég fékk að vita að barnið sem við Erling áttum von á var ekki bara eitt heldur tvö. Í þá daga tíðkaðist ekki að feður færu með í sónar og því fórum við Íris, sem þá var rúmlega tveggja ára, tvær saman til Reykjavíkur með Akraborginni og mamma, þessi elska, sótti okkur á bryggjuna og keyrði mig upp á spítala í sónarinn. Þá var heldur ekki til sónar á öllum landsbyggðarsjúkrahúsum eins og er í dag og konur fóru ekki í sónar nema grunur væri um að eitthvað væri ekki alveg samkvæmt áætlun og í mínu tilviki hélt ljósan að ég væri gengi lengra með en dagatalið sagði. Mig grunar nú samt alveg að henni hafi grunað hvað þetta var en ekki viljað segja neitt um það. Við Erling áttum heldur ekki heimasíma og því höfðum við ákveðið að hann færi á símstöðina í hádeginu til að hringja í mig og fá fréttir. Hann stóð því í símaklefa og ég sagði honum frá tveimur börnum á leiðinni og hann missti málið, sagði ekkert og þá meina ég ekkert í eina til tvær mínútur og ég alveg...Erling, Erling ertu þarna?


Já það hefur margt breyst síðan þá en samt eru bara 31 ár síðan Eygló og Arna, tvíburadætur okkar fæddust. Þær elska að vera tvíburar en það má samt ekki tala um þær sem tvíbura og þegar þær voru litlar þoldu þær ekki ef krakkar komu og spurðu eftir "tvíburunum". Þær eru ótrúlega samrýmdar og hugsa oft eins og það er eins og það sé óskiljanlegur þráður á milli þeirra. Stundum dreymir þær sömu drauma sömu nótt. Þær hafa alltaf verið okkur miklir gleðigjafar og við erum ákaflega stolt af þeim. Þær vinna báðar á leikskóla en samt ekki sama og það á vel við þær að vinna með börnum. Eygló er gift honum Bjössa og þau eiga tvö börn, Erlu Rakel 3ja ára og Andra Ísak eins árs. Arna er gift honum Hafþóri og hún á þrjár dætur frá fyrra hjónabandi, Daníu Rut 9 ára, Söru Ísold 8 ára og Þórey Erlu 6 ára. Arna og Hafþór eignuðust svo litlu Hrefnu Björgu 21. febrúar sl og er hún því rétt um viku gömul og það munaði bara einum degi að hún fæddist á afmælisdegi Andra Ísaks frænda síns.


Elsku stelpurnar mínar, við pabbi ykkar óskum ykkur innilega til hamingju með daginn ykkar, við vitum að þið munuð njóta hans og við hlökkum til að hitta ykkur hér í sveitinni á laugardaginn. Við elskum ykkur meira en orð fá lýst.

mánudagur, febrúar 20, 2012

Andri Ísak afmælisstrákur



Ég er svo lánsöm að eiga mörg barnabörn, 7 stelpur og 2 stráka og í dag á annar af þeim afmæli er orðinn eins árs. Það er í raun alveg ótrúlegt að það skuli vera komið ár síðan við vorum að bíða þann sunnudag því við vissum að hann væri alveg að koma og mikið var nú gaman þegar símtalið kom loksins og flottur og fínn strákur mættur á svæðið. Foreldrar hans vildu ekki vita kynið fyrirfram og því var þetta enn meira spennandi dagur. Já hann Andri Ísak er orðinn eins árs og hann á eina stóra systur, Erlu Rakel 3ja ára, og stundum tekur hún utanum um hann og segist elska þennan kút, hrikalega krúttlegt. Andri Ísak er alger hjartabræðari og heillar alla í kringum sig. Hann er mikill mömmustrákur og mömmu hans leiðist það nú ekki því þau systkinin skipta sér á milli foreldranna því systir hans er alger pabbastelpa.


Elsku Andri Ísak, við afi þinn óskum þér innilega til hamingju með daginn þinn, þú ert alger Guðs gjöf inní líf okkar. Vonandi fer þér að batna af þessari leiðindaflensu svo það sé hægt að halda uppá daginn þinn. Við elskum þig endalaust litli kúturinn okkar

miðvikudagur, febrúar 15, 2012

Sara Ísold afmælisstelpa



Það er ekki ofsögum sagt að það er líf og fjör í kringum afmælisbarn dagsins, henni liggur mikið á að verða fullorðin enda sagði hún um daginn við mömmu sína þessa setningu: "Maður verður ótrúlega pirraður þegar maður fær unglingaveikina, maður verður slappur og allt." Þó er það svo að þessi unga dama er bara átta ára í dag en vildi nú helst vera 18 því þá gæti hún flutt að heiman og fengið sér bæði hest og hund en hún skilur ekkert í því að mega ekki fá þau dýr bara strax. Já það er hún Sara Ísold ein ömmustelpan mín sem fagnar einu árinu í viðbót í dag. Ég man vel símtalið sem kom þennan fallega sunnudagsmorgunn og okkur afanum tilkynnt um fæðingu hennar. Hún er skemmtileg og skýr stelpa með ákveðnar skoðanir á öllu og er mikill heimspekingur. Henni gengur vel í skólanum og er vel liðin þar og fær frábærar umsagnir. Í hennar augum er lífið alls ekki flókið. Hún ásamt systrum sínum er viku og viku hjá pabba sínum og svo mömmu sinni og núna eiga þær systur von á lítilli systur hjá mömmu sinni og Hafþór pabba. Henni finnst auðvitað ekki réttlátt að litla systir þurfi svo alltaf að vera bara hjá foreldrum sínum og fái ekki að fara neitt annað þannig að hún er búin að segja pabba sínum að auðvitað þurfi hann svo að taka litlu systur stundum þegar Arna og Hafþór verða þreytt. Svo var það fyrir stuttu að það barst í tal að þær væru líka sænskar og Sara Ísold hafi nú einhverjar áhyggjur af því að litla systir væri ekki líka sænsk en var svo snögg að finna lausnina því Doris, föðuramma þeirra, myndi auðvitað kenna litlunni sænsku. Um að gera að vera ekki að flækja málin neitt.






Elsku Sara Ísold okkar, við afi þinn óskum þér innilega til hamingju með afmælisdaginn þinn, við vitum að það verður dekrað við þig í dag. Þú ert alger Guðs gjöf inn í líf okkar og við elskum þig marga marga hringi.

miðvikudagur, janúar 25, 2012

Lifðu lífinu lifandi, vertu til, taktu þátt

Ég hef sagt það áður og segi það enn að ég elska lífið sjálft, enda er það dýrmæt gjöf sem okkur er gefin til þess að njóta. Lífið með öllum sínum fjölbreytileika er bara of skemmtilegt til að taka ekki þátt í því af fullum krafti. Auðvitað veit ég að það geta ekki allir gert það því stundum taka t.d. sjúkdómar af manni völdin. En það er samt oft með þá sem eru í fullu fjöri að þeir virðast bara áhugalausir um lífið og tilveruna, eru bara þarna, taka ekki þátt í neinu sem er um að vera kringum sig eru kannski alltaf að bíða eftir einhverju og þegar það er komið þá er gaman að vera til. Hamingjan er ekki endastöð heldur ferðalag og með því að vera alltaf að bíða eftir einhverju sem gerist seinna þá er svo mikil hætta á að missa af svo mörgu því hversdagurinn getur verið svo innihaldsríkur og skemmtilegur ef við bara gefum honum tækifæri. Stöldrum við og sjáum það sem er í vegi okkar, það er enginn vandi að ganga framhjá öllum fallegu steinunum (líkingamál) sem eru á vegi okkar ef við horfum alltaf langt fram í tímann. Það er samt auðvitað alltaf gaman að hlakka til einhvers og ég held reyndar að það sé nauðsynlegt að hafa eitthvað til að hlakka til eða langa að gera en þangað til það gerist er jafn nauðsynlegt að vera virkur þátttakandi í hversdagslífinu. Hafa gaman að því að vinna vinnuna sína, sjá það sem gleðiefni að það séu óhreinir diskar í vaskinum, óhreinn þvottur í þvottahúsinu, ryk á hillum því það táknar að það er líf í kringum okkur. Ef við höfum ekki vinnu þá eru ótal námskeið sem eru í boði og um að gera að nýta sér það. Tökum þátt í að gera lífið skemmtilegra, verum virk í hversdagslífi okkar, tökum þátt í samræðum, verum til, brosum til samferðarfólks okkar, heimsækjum hvert annað og látum okkur varða um annað fólk, þetta er svo stuttur tími sem við höfum á þessari jörð, notum hann. Ekki sitja ein eða einn úti í horni hvort sem er í kafftímanum í vinnunni eða í afmælum í fjölskyldunni og halda að "þau" kæri sig nú ekkert um mig eða mínar skoðanir, við erum sköpuð til samfélags við annað fólk og þínar skoðanir eiga jafn mikinn rétt á sér og allra annarra. Lifum lífinu lifandi meðan við eigum það, njótum þess að vera til, látum draumana rætast ef við mögulega getum.....já það er víst satt að Erlan elskar að vera til

laugardagur, janúar 07, 2012

Hrund afmælisstelpa

Það var sunnudagur eins og í dag og við vissum að þetta væri dagurinn sem fjórða barnið okkar Erlings myndi mæta á svæðið. Við vorum búin að ákveða bæði stúlku- og drengjanafn því við vissum ekki kynið á barninu. Það var svo rétt fyrir klukkan fjögur þann eftirmiðdag sem við brostum út að eyrum og buðum litlu yndislegu Hrund velkomna í heiminn. Já þótt ótrúlegt sé þá eru 23 ár síðan youngsterinn okkar leit dagsins ljós í fyrsta sinn, opnaði annað augað, sá föður sinn, leist vel á hann og hefur séð að hún var komin í öruggar hendur. Hún varð eftirlæti systra sinna allavega svona þangað til hún fór að skríða og laumast svo í dótið þeirra, þá gilti ekki lengur þetta "hún má alltaf leika með dótið mitt og allt það" sem sagt var á fyrstu dögunum hennar :)
Okkur foreldrum þeirra til mikillar ánægju eru þær miklar vinkonur allar í dag og eyða miklum tíma saman.


Hrund er hæfileikarík ung stúlka, fæddur leiðtogi og samkvæm sjálfri sér. Hún stundar sálfræðinám við Háskólann í Reykjavík og hefur kynnst þar fullt af skemmtilegum krökkum sem hún eyðir tíma með bæði við nám og skemmtun. Auk þess stundar hún söngnám og skrifar pistla á spegill.is.


Hún leigir íbúð hjá Námsmannaíbúðum en það er voða notalegt þegar hún kemur austur um helgar og eyðir tíma með okkur foreldrum sínum.


Elsku Hrundin okkar, við pabbi þinn óskum þér innilega til hamingju með daginn þinn, þú ert sama afmælisbarnið og mamman þín og haltu í það eins lengi og þú getur. Við elskum þig meira en hægt er að segja með orðum og erum afar stolt af þér.

föstudagur, desember 30, 2011

Orð eru álög...

...er nafn á bók sem ég fékk í jólagjöf og við Erling höfum verið að velta þessum orðum fyrir okkur. Einhvers staðar segir einnig að orð séu til alls fyrst og í helgri bók segir að dauði og líf sé á tungunnar valdi.
Við og krakkarnir höfum núna í nokkur ár sest niður á nýársdag og velt fyrir okkur markmiðum fyrir árið sem er að byrja, við skrifum þau niður og skoðum svo að ári, hvað hefur ræst og hvað ekki. Þetta eru ekki áramótaheit heldur markmið sem við gjarnan viljum sjá rætast hjá okkur. Ég hef verið að velta því fyrir mér hvað ég ætla að setja á blaðið mitt eftir tvo daga og hugsa meira og meira um þetta að...orð eru álög..... það skiptir svo miklu máli hvað við segjum því það sem við tölum út er eitthvað sem undirmeðvitundin fer að vinna að. Ef það er eitthvað sem við virkilega viljum gera þá er árangursríkara að segja "ég ætla" heldur en "ég vona" Ég hef ákveðna hugmynd um hvernig og í hvaða kringumstæðum ég vil sjá mig á nýju ári og ætla að prófa þetta á sjálfri mér, vera ákveðnari í markmiðasetningu og framfylgja því af fremsta megni, því ég get það sem ég vil. Ég er viss um að um næstu áramót hafa markmið næsta árs ræst.... ég ætla einnig að gæta orða minna í daglegu tali því þau hafa vægi og verða aldrei tekin tilbaka....

þriðjudagur, desember 27, 2011

og svo komu jólin.....

Það var svolítið skrýtið á aðfangadagsmorgunn að hafa sig til og fara í vinnu en það hef ég aldrei gert áður. Það var heilmikil umferð þegar ég keyrði út í búð, fólk að flýta sér því jólin voru jú alveg að koma. Ég var varla búin að kveikja á kertunum í búðunum þegar fyrsti viðskiptavinurinn kom, fólk var kátt og spjallaði þótt það þekkti mig ekkert. Þegar ég keyrði svo heim þá var strax komin meiri ró yfir bæinn minn, fólk flest komið heim til sín að undirbúa hátíðina sem yrði hringd inn kl sex. Erling og Hrund voru tilbúin með okkar hefðbundna hádegismat á aðfangadag og það gerði ekkert til þótt það væri ekki á "réttum" tíma. Hrund hafði á orði að það væri svo skrýtið hvernig tilfinning aðfangadags hefði breyst og við foreldrarnir litum á hvort annað og sögðum svo næstum í kór að þetta væri vegna þess að hún væri ekki lengur barn og þá upplifir maður hlutina öðru vísi. Jóladagarnir hafa verið góðir, við hér erum mjög fastheldin á hefðir og breytum engu varðandi þessa 3 daga nema nauðsyn þyki. Á þriðja degi jóla var ákveðið að bjóða letinni í heimsókn og hún var ekki sein á sér að koma inn enda ekki oft sem henni leyfist það og deginum varið í lestur, mandarínuát og sjónvarpsgláp í góðum félagsskap flotta míns og youngstersins míns. Allar þrjár myndir Lord of the rings, lengri útgáfan, voru teknar á tveimur kvöldum, spáið í því.
Lífið mitt hér í Húsinu við ána er afar ljúft, oft annasamt en næstum alltaf skemmtilegt líka. Það er gott að hafa vinnu, eiga fjölskyldu sem er svo auðvelt að elska og sem elskar mann og gefur lífinu gildi. Held það sé fátt betra en finna litla ömmubarnahandleggi umvefja mann og heyra hvíslað í eyrað að þau elski mann eða þegar Erling grípur mig í fangið og segir mér hvað hann sé ánægður með mig. Þá læðist inn í hugann að einhverju hefur verið áorkað.
Framundan eru áramót einu sinni enn og nýtt ár bíður handan hornsins og það er spennandi að sjá hvað verður skrifað á þá blaðsíðu kaflans.

fimmtudagur, desember 22, 2011

....þau eru alveg að koma.....

Jólalögin óma á efri hæðinni, youngsterinn kominn heim í jólafrí og nú skal herbergið tekið í gegn mömmslunni til mikillar gleði :) Það er notalegt að heyra í henni og hún á það til að söngla með enda er söngur hennar líf og yndi. Jólahátíðin nálgast okkur hér í Húsinu við ána þrátt fyrir annríki undanfarinna daga. Aðventan hjá okkur hefur verið með öðru sniði en áður enda höfum við ekki áður verið með verslanir sem þarf að hugsa um að séu með nóg af vöruúrvali fyrir viðskiptavininn. Ég ætla svo sjálf að vera við afgreiðslu á aðfangadag og það er líka nýbreytni, ég man ekki eftir að hafa áður unnið á aðfangadag en er viss um að það er bara gaman. Hrund verður með mér í hinni búðinni og svo veit ég að það bíður okkar dekur þegar við komum heim. Í gær tókum við á móti fyrstu sendingunni frá Ameríku fyrir Home design og það var pínu undarleg tilfinning að hafa tollapappíra í höndum og vera sjálf "innflytjandi". Það kom mér líka á óvart hvað þetta var allt einfalt í sniðum og tók stuttan tíma frá pöntun þar til það beið tollafgreitt í vöruskemmu í Hafnarfirði. Ég las áðan viðtal við "fræga" konu og sú var auðvitað spurð hvernig hún færi að því að fitna ekki um jólin. Ég var ánægð með svarið því hún sagðist fitna um jólin og ef hún gerði það ekki þá væri bara eitthvað að. Hins vegar er ljóst af útliti hennar að það er kannski ekki mikið og fer fljótt af en viðhorfið var gott. Leyfum okkur að njóta alls þess góða sem í veg okkar er lagt en munum samt að allt er gott í hófi og ef við erum aflögufær þá eru margir sem ekki eiga til hnífs og skeiðar þessi jól og ýmis samtök sem geta verið milliliðir til þeirra.

fimmtudagur, desember 15, 2011

Fimmtudagur verður að laugardegi

Það er enginn sem segir að það þurfti endilega alltaf að hafa laugardaga bara á laugardögum og því ákváðum við Erling fyrir tveimur dögum að hafa laugardag í dag þótt það sé auðvitað fimmtudagur. Það var því engin ástæða til að drífa sig á fætur eldsnemma en mikið var nú notalegt að koma niður á náttfötunum og fá sér morgunmat og kaffi með þessum flotta manni sem ég á. Það er jólalegt að líta út um gluggana og sjá jólaljósin í húsunum í kring glampa svona fallega í snjónum og áin okkar rennur sína leið framhjá, ísköld og tignarleg. Stóra baðið eins og barnabörnin kalla hana, vitandi að það má ekki fara þangað.
Við ætlum að hafa þennan frídag okkar reglulega skemmtilegan, kíkja í höfuðborgina, gera smá jólainnkaup, hitta mann og annan og kíkja á kaffihúsið til hennar Erlu vinkonu minnar og reyna að hitta á barnabörnin og foreldra þeirra. Aðventan er skemmtilegur tími og ég er svo þakklát fyrir það að það er ekki undir mínum þrifnaðardugnaði eða baksturshæfileikum komið að jólin komi. Ef svo væri þá kæmu nefnilega engin jól á okkar bæ. Kósíheit og kertaljós er málið hér í Húsinu við ána og um að gera að láta ekkert jólastress ná tökum á okkur, jólin snúast um allt aðra hluti. Njótum þess að vera til vinir...

þriðjudagur, desember 06, 2011

Jól á næsta leiti

Eftir bókhaldsvinnu undanfarna daga var það bara notalegt að kúra aðeins undir heitri sænginni og leyfa sér að vakna í rólegheitunum. Verkefni dagsins lá ekki alveg ljóst fyrir, ekkert sem bráðliggur á að gera, tvær frábærar stelpur sjá um búðirnar tvær svo ekki þarf að huga sérstaklega að þeim í dag. Tilhugsunin um að vera innandyra í dag varð enn notalegri þegar ég dró svo frá gluggum eftir að hafa búið um rúmið. Úti var lygn og falleg snjókoma og bíllinn þakinn snjó, mikið var gott að fara bara niður og fá sér morgunmat og kaffi, vona að Erling hafi náð Fréttablaðinu (það er algert happ hér á Selfossi að ná blaðinu því það koma svo fá blöð í þessa blessuðu kassa) og já þá var verkefni dagsins ákveðið.
Skreytum hús með grænum greinum.....nei annars bara öllu fallega jólaskrautinu okkar, það er verkefni dagsins..... Svo kíki ég örugglega útí búð seinna í dag því Erling er þar að breyta ísbúðinni og vinna við innréttingu hennar. Þetta verður góður dagur og já.....Fréttablaðið var á eldhúsborðinu......

föstudagur, desember 02, 2011

Katrín Tara afmælisstelpa



Hún er ljóshærð með blá augu, mjög fjörug og skemmtileg, ákveðin og veit svo sannarlega hvað hún vill og hún er afmælisstelpa dagsins. Katrín Tara, ein af ömmustelpunum mínum og vinkona mín á afmæli í dag og er orðin sjö ára og það er sko ekki leiðinlegt. Hún er líka komin í annan bekk í skólanum og henni gengur mjög vel og fær frábæran vitnisburð enda dugleg í því sem hún er að gera. Hún er flinkur teiknari og er alltaf að teikna og lita flott listaverk handa okkur.

Katrín Tara á litla systir og sýnir henni óskipta athygli og er mjög góð við hana. Ég og hún eigum spes kveðju. Þegar hún var yngri þá vildi hún aldrei kyssa bless og þar sem ég er algerlega á móti því að þvinga börn til að kyssa fullorðna þá fundum við upp okkar eigin kveðju og höfum haldið því. Hún labbar í burtu, snýr sér við og ég sendi henni fingurkoss sem hún grípur og skellir á kinnina á sér og svo fæ ég einn tilbaka. Þvílíka krúttið.

Elsku Katrín Tara mín, við afi þinn óskum þér til hamingju með afmælisdaginn þinn, biðjum Guð að vaka yfir hverju þínu spori. Þú ert alger Guðs gjöf inn í líf okkar og við elskum þig meira en við getum sagt og hlökkum til að sjá þig á eftir.

miðvikudagur, október 26, 2011

Hann á afmæli í dag




Kalda vetrarnótt fyrir 52 árum fæddist hann á eftir hæðinni í húsi foreldra sinna. Hann var númer sjö í röðinni, fyrir voru 2 systur og 4 bræður og fjórum árum seinna fæddist svo yngsti bróðirinn. Þótt ekki sé lengra síðan þá tíðkaðist að konur fæddu börnin heima og sinntu jafnt út- sem innistörfum í hvaða veðri sem var, alla vega í sveitinni.

Hann var bara 16 ára þegar við kynntumst með mikið krullað sitt og strítt hár. Hann átti líka skellinöðru, svaka töffari og ég minnist þess þegar við Barbro vinkona fórum í helgarheimsóknir austur í Kot og fengur að vera aftan á til skiptis. Ég var orðin skotin í honum og ég held að hann hafi þá líka verið skotinn í mér. Pabbi og mamma samþykktu hann og daginn sem ég varð sautján trúlofuðum við okkur og okkur fannst við fullorðin. Lífið var alveg stórskemmtilegt og öll tækifæri notuð til að gera það enn skemmtilegra. Í dag, 33 árum seinna finnst okkur lífið enn skemmtilegra en þá. Við erum enn betri vinir og eyðum miklum tíma saman.

Afkomendahópurinn stækkar stöðugt, dæturnar eru fjórar, tengdasynirnir þrír, barnabörnin eru níu og eitt á leiðinni.

Já hann Erling minn fagnar í dag afmælinu sínu í 52. sinn. Síða krullaða hárið hefur að vísu löngu sagt skilið við hann og vangarnir eru orðnir eilítið silfraðir, barnabörnin okkar halda því reyndar fram að afi þeirra sé ekki með hár :) en þessi sjarmör nær ennþá að heilla ömmu þeira algerlega upp úr skónum. Ég er ákaflega stolt af honum, elska hann meira en hægt er að lýsa í fáum orðum og bið Guð að leyfa okkur að eldast saman svo við getum gengið saman inn í sólarlagið, tvær krumpaðar sveskjur hönd í hönd.




mánudagur, október 17, 2011

Þórey Erla afmælisskvísa



Þar sem ég er níu barna amma þá er ekki skrýtið að það séu oft afmælisskrif á síðunni minni. Það er mér samt alltaf mikil og sönn ánægja að segja ykkur frá afmælum þessara yndigulla sem skreyta lífið okkar Erlings meira en hægt er aðsegja í fáum orðum.

Í dag fagnar hún Þórey Erla sex ára afmælinu sínu og hún er sko búin að bíða eftir því. Hún er byrjuð í skóla og orðin fluglæs og skemmtir sér vel í skólanu, Svo er hún líka orðin nógu gömul til að geta farið í flugvél með systrum sínum að heimsækja ömmu og afa á Akureyri og það er sko spennandi skal ég segja ykkur. Þórey Erla er mjög geðgóð en veit samt alveg hvað húnvill og svo hefur hún ekkert fyrir því að vegja okkur afa sínum um fingur sér. Brosið hennar og stóru augun þegar hún kemur og smellir á mann kossi er algerlega ómótstæðilegt. Við erum góðar vinkonur og það er gaman þegar hún hringir og spyr hvort þau megi koma í heimsókn hingað á Selfoss. Hún er reyndar meiri afastelpa en ömmustelpa og ef hún hittir mig eina þá spyr hún alltaf um afa sinn áður en hún heilsar þetta litla yndigull. Hún er alger Guðs gjöf inn í líf okkar.


Elsku Þórey Erla okkar, við afi þinn óskum þér innilega til hamingju með daginn þinn, veit að þú verður dekruð í dag svo njóttu þess. Við elskum þig marga marga hringi, allan hringinn...

þriðjudagur, október 04, 2011

Erla Rakel afmælisstelpa...

Það eru þrjú ár síðan hún fæddist þessi litla ömmustelpa sem á afmæli í dag. Við sátum í límsófanum þann sunnudagsmorgun og biðum frétta því Eygló og Bjössi voru búin að vera alla nóttina á fæðingardeildinni og svo loksins komu fréttirnar að hún væri fædd. Já hún Erla Rakel á sko afmæli í dag. Um daginn sagði mamma hennar við hana að hún væri yndigull en hún var fljót að leiðrétta það og sagði mömmu sinni að hún væri stelpa, ekki yndigull. Erla Rakel er dugleg stelpa sem veit alveg hvað hún vill. Hún elskar litla bróður sinn og er afar góð við hann. Hún syngur heilmikið og spjallar við mann EF hún vill það sjálf, annars ekki :) Hún er líka mikil afastelpa og ef hún sér bara mig þá spyr hún eftir honum. Hún unir sér vel á leikskólanum sínum er dugleg þar.


Elsku Erla Rakel, við afi þinn óskum þér til hamingju með daginn þinn, þú ert alger Guðs gjöf inn í líf okkar og við elskum þig allan hringinn, marga hringi. Láttu nú dekra við þig í allan dag og við hlökkum til að koma í veisluna þína

sunnudagur, september 11, 2011

Karlott afmælisbarn


Það er stutt á milli afmæla þeirra hjónakorna Karlotts tengdasonar okkar og Írisar en í dag fagnar hann afmælinu sínu í 36. sinn.

Karlott er einstaklega ljúfur og góður drengur og hvers manns hugljúfi. Glaðvær og á einstaklega auðvelt með að umgangast fólk og spjalla við það. Hann studdi Írisi með ráð og dáð meðan hún lagði stund á lögfræðinámið sitt og nú er komið að honum og fyrir nokkrum dögum hófst nýr kafli í lífi hans þegar hann settist á skólabekk í Háskóla Íslands og nemur félagsráðgjöf. Þar er hann sannarlega á réttri hillu og ég efast ekki um að honum á eftir að ganga vel í þessu námi og hafa gaman af því.

Íris og Karlott eiga 4 yndisleg börn saman og eru einstaklega samhent um allt er viðkemur heimilishaldi og barnauppeldi. Börn hænast að Karlott og ég hef ósjaldan séð fleiri en hans börn trítla við hlið hans í leit að spennandi ævintýrum úti í náttúrunni þegar við stórfjölskyldan erum samankomin, annað hvort í Kofanum eða í einhverju ferðalaginu.

Karlott er haldinn mikilli veiðibakteríu og ég hef grun um að hann hafi ekki áhuga á að læknast af þeirri bakteríu.

Elsku Karlott, við Erling sendum þér afmæliskveðju héðan frá Tíról og óskum þér innilega til hamingju með daginn þinn, við erum afar ánægð með þig og stolt af þér og við vitum að Íris og börnin munu dekra þig í dag. Sjáumst svo vonandi sem fyrst.

þriðjudagur, ágúst 30, 2011

Íris afmælisstelpa

Það er alveg með ólíkindum hvað tíminn æðir áfram. Eins og hendi sé veifað þá eru liðin 33 ár síðan við Erling fengum frumburðinn í hendur. Yndisleg lítil stúlka sem lét samt bíða eftir sér í hálfan mánuð en sú bið var fljót að gleymast þegar hún var komin. Mamma mín sagði að ég væri heppin að hafa eyrun til að koma í veg fyrir að höfuðið klofnaði við brosið sem var fast á andliti mínu þegar hún kom að sjá fyrsta ömmubarnið sitt.


Íris hefur alltaf verið sjálfstæð og dugleg stelpa og lét ekki viðteknar venjur ákveða neitt fyrir sig og það voru löggu og bófaleikir frekar en barbí þegar hún var lítil stelpa. Reyndar var ég alveg viss um að ef hún myndi einhvern tímann eignast dóttur eða dætur þá yrðu þær aldrei klæddar í bleik föt en sú varð þó ekki raunin því dætur hennar þrjár eru oftast í bleiku og sonurinn í ekta strákafötum. Íris og Karlott maðurinn hennar eru einkar samhent hjón og eru dugleg að eyða tíma með börnunum sínum fjórum og skapa skemmtilegar minningar fyrir þau í minningarbankann. Hún er alger snillingur í kökugerð og hefur gert margar flottar kökur við hin ýmsu tækifæri og má þar nefna brúðartertu sem hún gerði um daginn fyrir brúðkaup Örnu systur sinnar og Hafþórs. Hún er núna í fæðingarorlofi en hún starfar sem lögfræðingur hjá Ríkisskattstjóra og unir sér vel þar.


Elsku Íris mín, við pabbi þinn óskum þér innilega til hamingju með daginn þinn, veit að þú verður dekruð og mundu að við elskum þig marga marga hringi, allan hringinn, þú ert okkur afar dýrmæt Guðs gjöf og einn af augasteinunum okkar.

þriðjudagur, ágúst 23, 2011

Petra Rut afmælisgull

Ég er alveg einstaklega rík kona, á marga afkomendur og tengdabörn og í dag er einmitt afmæli í stórfjölskyldunni minni. Ung stúlka, næst elst barnabarnanna minna er 9 ára gömul í dag. Já það er einmitt hún Petra Rut mín sem fagnar einu ári í viðbót. Hún, líkt og mamma hennar fæddist nánast fullorðin og hún er mjög dugleg og samviskusöm stelpa. Ákveðin og veit hvað hún vill, elskar litlu systkini sín þótt auðvitað fari þau stundum í taugarnar á henni nema kannski helst sú yngsta, Marta Líf. Hún elskar að fá að halda á henni og hugga hana. Petra Rut var fljótt læs og skrifandi og fær frábærar umsagnir í skólanum sínum. Hún er afar listræn og teiknar þvílíkt flott og hannar föt á dúkkurnar sínar og teiknar þau á blað.

Hún er mikil vinkona mín og það er svo gaman þegar við hittumst hvað hún fagnar manni vel og hún er alltaf til í að kíkja í heimsókn til okkar afa síns og ömmu. Uppáhalds liturinn hennar er fjólublár. Hún er líka mjög flink í fimleikum og hefur afar gaman af þeim.



Elsku Petra Rut mín, við afi þinn óskum þér innilega til hamingju með daginn þinn, við vitum að þú verður dekruð sem aldrei fyrr og við hlökkum til að koma í afmælisveisluna þína.

Þú ert alger Guðs gjöf inn í líf okkar og við elskum þig marga marga hringi.